嚮往旅遊

今天是一個特別的日子,我同老婆相識10週年

10年好似好耐,但對於我來說,時間過得太快
我同老婆相處一直都很好,最初相識時雙方都較年輕
有時都會有嗌交,但好快就無事,期後大家都摸清雙方個底
咁就結埋婚,生左舊叉燒

轉眼間就10年了,個仔都5歲,期間真係辛苦哂老婆,多謝你

題外話講完,係時候開始痛苦的旅程
迪士尼成人票,我是在澳門某買賣平台購買的,平均每張平30元左右
而小童票就麻煩少少,因為剛巧有香港親戚來澳,便麻煩他們到某旅行社購買
這樣我們一家三口的門票差不多平了100大元



↑我們乘塔氹仔金光飛航09H30航班
仔仔知道今日去迪士尼,非常開心,因為我們每一次都唔會提早同佢講
每次都係一起身先同佢講,因為驚小朋友太興奮會病
一大清早話去迪士尼,真係四萬咁口


↑自拍一下先,仔仔難掩興奮的心情


↑由坐船到香港,再到迪士尼,其實都已經11點多


↑正正中午時份,太陽的威力真係唔講得少
原本找了路人幫我們拍照,但攝後發現完全影唔到後面的主體
所以都係自己操刀


↑我去寄存行李期間,兩個好似已經筋皮力盡咁


↑終於有一張四正少少的合照


↑排隊影相真係重要景點之一,因為小朋友一定好鍾意
好彩每次排隊都不超過30分鐘


↑迪士尼不會像某些遊樂場,他們願意幫遊客拍照,又不會強迫買相


↑拍攝技術又好,完全無失敗作


↑排隊期間,仔仔遇到一個女仔,仔仔又想同佢講野,又怕醜,好搞笑


↑米妮一黎就好熱情,攪到仔仔措手不及


↑米奇米妮係仔仔至愛,排幾耐都抵哂


↑這個巴斯光年遊戲,我們足足玩了3次,排隊時間又短,對仔仔來說又刺激


↑第一次唔識玩,都唔知做咩,到知做咩時已經差唔多玩完
但第三次我已經唔需要理佢,佢自己已經識射怪獸


↑佢已經被巴斯光年上左身


↑大約中午1點,我們先用膳,唔好以為仔仔好攰,其實佢又係扮訓
園內有4間餐廳,但有3間都係西餐,西餐大多都係麵粉為主
所以唯有選最後一間,其實係美心快餐開的


↑等到有位,佢又扮訓


↑仔仔每次有得玩,都可以唔訓下午覺,仲一直維持到晚上




↑食物都幾好,最緊要仔仔啱食


↑食完出黎,剛好巡遊表演開始,現場人山人海
我記得早幾年同老婆黎時,園內非常寧靜,人流不多,連巡遊時都只有數拾人
真係今時唔同往日


↑反斗奇兵區,這區的人流真的不能開玩笑,嚇死我
機動遊戲大多要輪候一個半小時,咁我們唯有到處拍照算了




↑好靚的場景


↑仔仔屋企都有一個薯蛋頭




↑這個遊戲算是我們玩過當中,排得較耐的一個
仔仔第一次坐,又興奮又開心


↑仔仔見到真的巴斯光年,竟然唔敢過去影相,但同巴斯交流一下之後又變得興奮


↑這個是我的指定動作,每到一個地方,我都會找一些紀念價值較高的物品


↑仔仔覺得好新奇


↑又是到處拍拍照時候


↑我們決定留低睇煙花,所以在園內食晚飯,又再次到美心快餐
晚上的餐牌不同了,都是小炒為主,我忘記拍照
這裏的小炒好大份量,我們叫了三個,只能消滅6成左右


↑天氣炎熱,整返杯沙冰,爽呀!


↑玩足一日,仲咁精神,難為我得返半條人命


↑原本話睇煙花,點知媽媽和仔仔都寧願SHOPPING,唉......


↑經過一天的辛勞,整返個熱水浴,這次是我和仔仔第一次浸浴
你睇佢幾享受,其實又係扮野

總括今天
實在太辛苦了,帶小朋友去迪士尼根本唔會有休閒的可能性
小朋友精力充沛,難為我和媽媽半天已經想離開了
香港迪士尼感覺上快要下沉了,人真的太多,雖然是暑假期間
但平日都這樣,未免太可怕了吧!如果假日,我真係唔敢想像
園內雖然多人,但大致上秩序良好,工作人員友善
園內真的很多內地人,但他們大多都遵守秩序

我從來都相信,周圍環境係可以影響一個人的文化和品德
當大部份人都守規時,少數人自自然然就會跟隨這套規則
其實有時人與人之間一開始已經存在偏見,又點樣談融洽呢
年紀大了,廢話都多d